Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 45.15 | Dem. 45.19 (English) | >>Dem. 45.21 |
45.17Ἀθήνησιν μὲν τοίνυν ὁ πατὴρ ἐτελεύτησεν οὑμός , ἐγίγνετο δʼ ἡ δίαιτʼ ἐν τῇ ποικίλῃ στοᾷ , μεμαρτυρήκασι δʼ οὗτοι παρέχειν τὸ γραμματεῖον Ἀμφίαν πρὸς τὸν διαιτητήν . οὐκοῦν εἴπερ ἀληθὲς ἦν , ἐχρῆν αὐτὸ τὸ γραμματεῖον εἰς τὸν ἐχῖνον ἐμβαλεῖν καὶ τὸν παρέχοντα μαρτυρεῖν , ἵνʼ ἐκ τῆς ἀληθείας καὶ τοῦ τὰ σημεῖʼ ἰδεῖν οἱ μὲν δικασταὶ τὸ πρᾶγμʼ ἔγνωσαν , ἐγὼ δʼ εἴ τις ἠδίκει με , ἐπὶ τοῦτον ᾖα .
45.18νῦν δʼ εἷς μὲν οὐδεὶς ὅλον τὸ πρᾶγμʼ ἀνεδέξατο , οὐδὲ μεμαρτύρηκεν ἁπλῶς , ὡς ἄν τις τἀληθῆ μαρτυρήσειεν , μέρος δʼ ἕκαστος , ὡς δὴ σοφὸς καὶ διὰ τοῦτʼ οὐ δώσων δίκην , ὁ μὲν γραμματεῖον ἔχειν ἐφʼ ᾧ γεγράφθαι “διαθήκη Πασίωνος ”, ὁ δὲ πεμφθεὶς ὑπὸ τούτου παρέχειν τοῦτο , εἰ δʼ ἀληθὲς ἢ ψεῦδος , οὐδὲν εἰδέναι .
45.19οἱδὶ δὲ τῇ προκλήσει χρησάμενοι παραπετάσματι διαθήκας ἐμαρτύρησαν , ὡς ἂν μάλισθʼ οἱ <μὲν > δικασταὶ ταύτην τὴν διαθήκην ἐπίστευσαν τοῦ πατρὸς εἶναι , ἐγὼ δʼ ἀπεκλείσθην τοῦ λόγου τυχεῖν ὑπὲρ ὧν ἀδικοῦμαι , οὗτοι δὲ φωραθεῖεν τὰ ψευδῆ μεμαρτυρηκότες . καίτοι τό γʼ ἐναντίον ᾤοντο τούτου . ἵνα δʼ εἰδῆτε ταῦθʼ ὅτι ἀληθῆ λέγω , λαβὲ τὴν τοῦ Κηφισοφῶντος μαρτυρίαν .
Μαρτυρία
Κηφισοφῶν Κεφαλίωνος Ἀφιδναῖος μαρτυρεῖ καταλειφθῆναι αὑτῷ ὑπὸ τοῦ πατρὸς γραμματεῖον ,ἐφʼ ᾧ ἐπιγεγράφθαι “διαθήκη Πασίωνος .”
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 45.15 | Dem. 45.19 (English) | >>Dem. 45.21 |